Pli lunsch che nus giain ensi cun l'auto, pli pitschnas che las chasas en la val daventan. Igl è ina gievgia marvegl, il tschiel sur il Surses è grisch. Il lavurer da vischnanca Adriano Peterelli va cun auto. El è luc e da buna luna, la giacca da neon oranscha traglischa.
Sia incumbensa è oz da far in trutg pli lad. «Ti n'has mai il medem di», di el. «I ha vent, i n'ha betg sulegl, las temperaturas n'èn er betg uschè agreablas. Jau sun bain era in tip che va gugent a spass e che va bler en las muntognas.»
Sin l'Alp Somtgant en il territori da skis da Savognin fraina el. El prenda ora in zappun ed ina pala e va tar la via da viandar marcada - ses chalzers grevs laschan enavos fastizs en la terra loma.
Nus n'avain betg adina la survista nua che tge sto vegnir fatg. Cunzunt ussa che la naiv è pir luada – sin las vias pli autas n'eran nus anc betg.
Il lavurer communal mantegna en dus var 500 km sendas – memia bler per avair adina la survista. El survegn dentant agid da pasturs, ciclists e curriders da trails. Tgi che dovra savens la senda vesa natiralmain gist, nua ch'ina planta è sin via u nua che la via è prest creschida en.
-
Bild 1 von 5. Bildquelle: RTR.
-
Bild 2 von 5. Bildquelle: RTR.
-
Bild 3 von 5. Bildquelle: RTR.
-
Bild 4 von 5. Bildquelle: RTR.
-
Bild 5 von 5. Bildquelle: RTR.
Per mantegnair las sendas dovra quai dentant anc bler dapli lavur, declera Adriano Peterelli. Quai ch'el fetschia era fitg savens la stad saja marcar ils trutgs cun pals, mabain er cun marcaziuns sin crappa, ch'el malegia cun colur. Vitiers vegnan la creaziun da sendas da viandar tematicas, la construcziun da punts, la repartiziun da signalisaziuns per l'entir territori ed er far rundas da controlla.
Jau fatsch gugent quai. Igl è adina auter – bel è atgnamain tut.
Mantegnair sendas è ina lavur che n'è mai propi a fin e che dura da la primavaira fin l'atun. Ma frustranta na saja ella tuttina betg - l'engraziament dals giasts che vegnan en il Surses per ir a viandar u cun velo fa adina plaschair ad el.