Per las biatletas ed ils biatlets svizzers èn ils campiunadis mundials a Lai ids a fin senza medaglia. Aspectaturas ed aspectaturs hai dentant dà ina massa – passa 80'000 persunas han persequità las cursas.
Ils emprims campiunadis mundials da biatlon en Svizra ch'han gì lieu a Lai sajan stads in grond success, ha ditg il CEO Jürg Capol ad ina conferenza da medias suenter l'occurrenza gronda. Cun passa 80'000 aspectaturas ed aspectaturs durant nov dis da concurrenza sajan las aspectativas vegnidas surpassadas cleramain.
Avant l'occurrenza n'aveva la Svizra strusch experientscha en il biatlon, ma ils campiunadis mundials han purtà il sport sin la charta geografica svizra. Ursin Fravi è stà in dals motors dal biatlon en il Grischun.
En tut èn pli che 800 voluntarias e voluntaris stads en acziun. RTR ha purtretà intgins ed intginas. A fin è ida la carriera da Elisa Gasparin, ella è vegnida festivada suenter sia davosa cursa. Per Aita Gasparin cuntinuescha dentant sia carriera era quest enviern.