Siglir tar il cuntegn

Header

cuntegn

Bova Brinzauls Emprimas immobiglias vegnan sbuvadas pervi da donn total

Questa stad vegnan sbuvadas a Brinzauls ina stalla ed ina chasa d’abitadi. Quai pervi dals gronds donns ch’igl ha dà perquai che la terra è ferm en moviment.

Ils dus possessurs da las immobiglias survegnan in'indemnisaziun da l’Assicuranza d’edifizis dal Grischun, e quai malgrà che las immobiglias na fissan atgnamain gnanc stadas assicuradas. In dals pertutgads è Daniel Capitani che posseda ina stalla a Brinzauls cun in donn total. Enfin avant in onn nizzegiava el la stalla anc per ses hobi: Ensemen cun amis reparava el là oldtimers. Pervi dal donn total vegnia la stalla destruida ils 13 da fanadur.

Cura che jau hai cumprà la stalla avant set onns, hai jau laschà far in’analisa geologica, e là n’era betg d’imaginar ch'ils moviments en la terra s’augmentian uschè ferm mo in pèr onns pli tard .
Autur: Daniel CapitaniPossessur da la stalla

Daners grazia a nova lescha

Dapi l’emprim d’avrigl 2019 datti ina nova pratica tar l’Assicuranza d’edifizis dal Grischun: Sch’in bajetg vegn donnegià perquai ch’il terren ruschna permanentamain, è quai da nov curclà entras l’assicuranza. Pli baud eran ils bajetgs assicurads be en cas d’in sbuvaditsch spontan.

Donn total gia avant lescha nova

Las duas immobiglias che vegnan sbuvadas proximamain a Brinzauls pervi d’in donn total, han gia gì in donn total avant che la nova lescha è ida en vigur. Perquai n’avessan ils possessurs da quellas immobiglias betg il dretg sin in'indemnisaziun da l’assicuranza d’edifizis. Tuttina han ins chattà ina soluziun per la possessura ed il possessur:

Las immobiglias han gia gì in donn total avant che la lescha è ida en vigur, perquai avain nus ditg ch’i na po betg esser, che quels paucs bajetgs pertutgads crodan tranter maisa e sutgas. Uschia avain nus tschertgà ina soluziun ch’era quels survegnan in'indemnisaziun.
Autur: Markus FeltscherDirectur Assicuranza d'edifizis dal Grischun

Grazia ad in fondo d’agid urgent da la cassa da donns elementars, haja la regenza approvà quella soluziun. Sco quai che Feltscher ha ditg, sajan questas summas en il rom da la nova lescha che segirescha era donns totals tar sbuvaditschs plauns.

RTR actualitad 07:00

Artitgels legids il pli savens

Scrollar a sanestra Scrollar a dretga