Per las abitantas ed ils abitants da Brinzauls è la gallaria da drenascha ina segirezza. La gallaria, cun ina lunghezza da passa 2,5 kilometers, è gia per 80% da la lunghezza rutta or. Dals bun 100 puncts da drenascha èn gia realisads ina terza.
Questa drenascha ha gia in fitg bun effect, han confermà ils geologs. Il rutsch da vischnanca sa mova uschia cun pli pauc che 15 centimeters ad onn. Mintga minuta vegnan per il mument manà davent radund 1'000 liters aua – quai èn en media 1,5 millliuns liters per di.
Las lavurs per la gallaria da drenascha han cumenzà la primavaira 2024. L'entira construcziun duai esser terminada la fin dal 2027. Ils custs da 40 milliuns francs avessan da tanscher.
-
Bild 1 von 6. La gallaria da drenascha è terminada per 80%. Bildquelle: RTR.
-
Bild 2 von 6. En media vegnan ruts davent 6 meters da la gallaria da drenascha. Bildquelle: RTR.
-
Bild 3 von 6. En media curran davent passa 1'000 liters aua mintga minuta. Bildquelle: RTr.
-
Bild 4 von 6. La drenascha mussa l'effect giavischà. Bildquelle: RTR.
-
Bild 5 von 6. In terz dals puncts da drenascha èn gia furrads. Bildquelle: RTR.
-
Bild 6 von 6. Las lavurs cuzzan anc, l'entira construcziun duai esser terminada la fin da l'onn 2027. Bildquelle: RTR.
En tut custa la gallaria da drenascha 40 milliuns francs. Ils custs vegnan repartids sin il chantun e la Confederaziun (90%). Ils ulteriurs 10% dals custs vegnan repartids sin la vischnanca dad Alvra ed ils possessurs d'infrastructura pertutgads, quai èn la lingia d'Alvra da la Viafier retica, differentas vias chantunalas ed in conduct da current ferm internaziunal.
Dapi il schaner enavos en il vitg
La fin da schaner han las autoritads abolì l'evacuaziun dal vitg da Brinzauls, uschia ch'abitantas ed abitants han pudì turnar. Malgrà questa buna nova e malgrà l'effect da la drenascha resta in tschert ristg da moviments, d'ina bova e da forsa danovamain stuair bandunar la patria. Perquai datti era la pussaivladad da bandunar il vitg per dal bun e fabritgar ina nova existenza cun agid finanzial.
Ina part dals abitants è s'annunziada per ina translocaziun preventiva. Ils buns resultats cun la gallaria da drenascha sajan dentant era speranza per restar en vischnanca, ha ditg Daniel Albertin, il president communal, envers RTR.