Ir da la via da la staziun da Casti en la via principala è per ils automobilists ina sfida quotidiana. Il traffic circulescha cun 50 kilometers per ura e la vista sin vehichels che s'avischinan è savens dada pir l'ultim mument. Era peduns che vulan cuntanscher la butia dal tancadi da l'autra vart da la via han fadia da traversar la via a moda segira, nua ch’i manca ina strivla melna.
La vischnanca Albula/Alvra vesa en ina zona da tempo 30 la meglra schliaziun per questa situaziun precara. Ina dumonda correspundenta a l'Astra è dentant vegnida refusada. Era la proposta dad installar in'ampla n'ha chattà nagin consentiment da l'uffizi federal.
Paucs accidents per l'Astra – blers per la vischnanca
L'Astra argumentescha sia refusa cun il fatg ch'il traject tranter il tancadi e la staziun na saja betg in lieu cun blers accidents che giustifitgass ina zona da tempo 30. La vischnanca Albula/Alvra vesa quai dentant auter.
-
Bild 1 von 4. Mo cun in spievel èn da vesair ils autos che vegnan si da vischnanca. Bildquelle: RTR.
-
Bild 2 von 4. Mo cun in spievel èn da vesair ils autos che vegnan si da vischnanca. Bildquelle: RTR.
-
Bild 3 von 4. Autos da posta ston magari spetgar ditg per entrar en la via principala. Bildquelle: RTR.
-
Bild 4 von 4. Qua vuless la vischnanca in tempo 30 empè da 50 kilometers l'ura. Bildquelle: RTR.
Tranter il 2022 ed il 2024 hai dà set accidents en quest lieu, in da quels schizunt cun ina persuna grev blessada, ha ditg Patrizia Zannini, la vicepresidenta communala da la vischnanca Albula/Alvra. Era l’installaziun d'ina ampla frunta sin resistenza da l'Astra. Bain vesa l'Astra in avantatg per autos da posta, il disturbi per la circulaziun dal traffic sin la via naziunala saja pero memia grond.
Traffic public cun retards
Zannini crititgescha questa tenuta: «Autos da posta han savens retard, perquai ch’els ston spetgar per entrar en la via principala». La vischnanca Albula/Alvra na vul betg sa cuntentar cun la resposta negativa da l'Astra.
Sco proxim pass vegnia ella a communitgar en scrit a l'Astra ch'ella na giaja betg d'accord cun la refusa, di Patrizia Zannini. L'ultim pled en chaussa n'è anc betg pledà. La speranza è vinavant da pudair nizzegiar sinergias en connex cun la renovaziun da la staziun da Casti che cumenza l'onn che vegn.