La dispita davart il tempo 30 sin la via principala da Lantsch va en la proxima runda. Dapi passa sis onns pretenda ina petiziun dapli quietezza en il vitg – cunzunt pervi da la canera dal traffic. Surtut durant las fins d’emna sa sentan las abitantas ed ils abitants disturbads dal traffic, en spezial da motos.
Er il chantun vesa in basegn d’agir. Las mesiraziuns hajan mussà che las limitas da canera vegnian surpassadas en plirs lieus. Ord vista dal chantun è ina reducziun dal tempo la mesira la pli simpla ed efficazia per meglierar la situaziun.
Percunter giuditgescha la vischnanca da Lantsch la situaziun en moda differenta. La suprastanza communala è da l’avis ch’il tempo 30 saja surfatg e pauc efficazi. Plinavant saja in traject da radund 850 meters mengia lung. Perquai fa la vischnanca recurs cunter la decisiun dal chantun – il cas va ussa davant il Tribunal federal.
Tge ha la Dretgira superiura decidì?
Il tempo 30 possia procurar per ina circulaziun da traffic pli regulara sin il transit local stretg. Ina zona 30 possia procurar per dapli quietezza cun quai ch’i vegnia franà ed accelerà pli pauc. La mesira saja adattada e necessaria per proteger la sanadad e la qualitad da viver da la populaziun. Era la perdita da temp da var 40 secundas saja supportabla.