Siglir tar il cuntegn

Header

cuntegn

Tempo 50 e 30 Guidar pli plaun a Glion

La Regenza grischuna ha approvà il project da sanaziun cunter la canera en la vischnanca da Glion. Per reducir las emissiuns da canera permetta la regenza da reducir la sveltezza maximala generala.

Sin vias nua ch'igl è lubì da charrar cun 80 ubain 60 kilometers l'ura dastga la sveltezza maximala vegnir reducida sin 50 kilometers l'ura e sin vias cun 50 kilometers l'ura sin tempo 30.

Pertutgadas èn las vias chantunalas Via da l'Alpsu, Via da Ladir, Via da la Lumnezia, Via Sursilvana, Via da Siat e Via da Val S. Pieder sco er las vias communalas Via Porta Sura, Via Sontga Clau Sura, Via Sontga Clau Sut, Via Santeri, Bahnhofstrasse, Rathausgasse e Städtlistrasse.

La stad hai dà discussiuns

Il zercladur è la populaziun da Glion vegnida orientada davart las mesiras per reducir la canera ed introducir tempo 30 sin l'intschess da la citad.

Per proteger la populaziun da la canera sto il chaschunader, pia il possessur da l’infrastructura prender mesiras, en quai cas il chantun e la vischnanca. Ina da las mesiras pussaivlas è da reducir il tempo sin las vias. Uschia po la gronda part dals surpassaments da canera mesirads ils ultims mais vegnir reducì. Era l’aspect da porscher dapli segirtad è vegni preschentà, ma la discussiun ha mussà che betg tut las dumondas èn gia scleridas.

audio
Infurmaziun dal project
ord Actualitad dals 09.06.2022.
laschar ir. Durada: 3 minutas 33 Secundas.

Nua vegn la strivla melna?

En ina zona da tempo 30 vegnan per regla tut las strivlas melnas schliadas e las vias vegnan manadas cun ina precedenza da dretg. Quai vegn era fatg a Glion – cun ina excepziun: La cruschada dasper l'hotel Rätia resta sco fin qua, pia cun strivlas melnas. Er avant il center da cumpras «Marcau» hajan ins chattà ina schliaziun cun strivlas melnas, ha infurmà l’Uffizi da construcziun bassa.

En ils ulteriurs lieus da la citad dentant svaneschan las strivlas melnas. In punct da discussiun è stà la cruschada da la via Porclas cun la via Val. Qua admoneschan las abitantas ed abitants d’augmentar la segirtad, perquai che la situaziun actuala na saja betg cuntentaivla ed er la proposta betg. Tempo 30 na vegniss betg introducì sin l’entira via Val fin a la fin da Glion, mabain sulet sin ina part e quai na portia nagina migliur per la canera ed era betg per la segirtad, uschia han argumentà pliras convischinas.

La presidenta communala Carmelia Maissen ha argumentà che gist cun l’introducziun da tempo 30 saja la pussaivladad da far ina strivla melna en quest lieu dada, pertge avant na pudevan ins betg far quai pervia da la visibilitad che n’era betg dada. La finala ha la futura cussegliera guvernativa fatg attent ch’ins possia uss 30 dis prender posiziun en chaussa e ch’ins duessi era far quai.

audio
Tge di la populaziun
ord Actualitad dals 09.06.2022.
laschar ir. Durada: 3 minutas 13 Secundas.

Procedura cun retard

La vischnanca da Glion ed il chantun vevan planisà d’introducir il tempo 30 sin l’entschatta 2022. Las convischinas ed ils convischins han dentant remartgà che la publicaziun dal project era vegnida fatga sulet en il fegl uffizial chantunal e betg el communal. Quai ha alura gì l'effect che l’entir project ha stuì vegnir publitgà da nov.

RTR actualitad 08:00

Artitgels legids il pli savens

Scrollar a sanestra Scrollar a dretga