A la suprastanza fan part sis persunas. Presidiada vegn l’associaziun dal pur d’Alvagni Cordo Simeon. Sco ch’el ha ditg, saja l’intent da pudair cumprar anc quest atun la chasa da maz existenta da Cunter e la butia da la mazlaria Surses a Savognin. Ina decleraziun d’intenziun saja gia suttascritta. Ussa cun avair la basa legala ins possia entrar en tractativas concretas per la cumpra. Finanziada duess la cumpra vegnir cun la vendita da certificats da participaziun. La vendita cuzza fin l’avrigl. Ins haja survegnì empermischuns da radund 70’000 francs, ha ditg Simeon. El quinta cun investiziuns da 1,5 fin 1,7 milliuns francs. Dasper il chapital agen duess la finanziaziun grategiar cun agid da credits da bancas e cun daners da chantun e confederaziun (projects dal svilup regiunal PRE), sco era cun sustegn da l’Agid a muntogna svizzer.
Dapli creaziun da valur en la regiun
Cun la cumpra da la chasa da maz vulan ils purs pudair mazzar dapli biestga en la regiun ch’enfin ussa. Cun la vendita directa da la charn duessi dar dapli profit per ils purs e las puras, e cun la gastronomia duessi dar collavuraziuns. Ina da las finamiras saja anc da gudagnar ina persuna en la suprastanza che derivia da la gastronomia, ha ditg Simeon.
Or da l'archiv
