Per las chamonas dal CAS è il favrer il mais da partenza da la stagiun d'enviern. Perquai è l'impurtant ch'igl haja avunda naiv. Ma memia blera naiv n'è era betg bun. Actualmain hai blera naiv e cun quella è er il privel da lavinas aut. Perquai restan ils letgs per gronda part vids.
Nagins giasts vul automaticamain dir, naginas entradas finanzialas. La chamona da Medel sa chatta sin 2'524 meters sur mar. Dapi il cumenzament da la stagiun n'han els gì nagin giast. Ils custs da persunal e da las victualias restan però. Tenor la guardiachamona Patricia Venzin è il cumenzament da la stagiun betg stà bun, ma quai possia sa midar spert.
Cura ch'ins planisescha ina stagiun, fan ins era quint cun fasas nua ch'igl ha pli paucs giasts.
La speranza è gronda ch'il privel da lavinas sa bassia uschè spert sco pussaivel. Enfin là datti tuttina lavur. Tut quai ch'ins n'ha normalmain betg peda da far pon ins ussa prender mauns. Sco lavur da biro u far laina.
Er il Rifugio Saoseo en Puschlav ha avert per il turissem d'enviern. Auter che la chamona da Medel datti tar il Rifugio Saoseo intgins paucs giasts. Ma blers ch'avevan reservà ina stanza han puspè annullà pervia dal privel da lavinas.
Actualmain avain nus bleras stanzas vidas.
Tenor il guardiachamona Gigi Murtas n'han els però betg survegnì tanta naiv sco auters lieus ed ils giasts che vegnan tar els e fan turas èn fitg cuntents cun las cundiziuns da naiv.
Situaziun da naiv en Val da Camp
-
Bild 1 von 2. Corn da Camp. Bildquelle: Rifugio Saoseo.
-
Bild 2 von 2. La via en la Val da Camp. Bildquelle: Rifugio Saoseo.
Il persunal ch'els han impiegà per questa stagiun na stoppian els betg relaschar per il mument. Ins emprovia da dar liber ils dis ch'els han da bun e da retrair gia ussa ils dis da vacanzas. Cun la speranza che las reservaziuns creschian puspè e ch'ins haja lura puspè dapli lavur.