Tema da crudar l'onn suenter il grond project «Rieischs» en ina rusna n'ha il president dal Chor viril Surses Giancarlo Lozza betg. Per l'ina haja la concurrenza svizra dals chors il favrer a Cuira dà anc ina giada ulteriura motivaziun e per l'autra saja in chor regularmain pront per concerts spezials. Ussa per exempel cun il Chor viril Neustift dal Tirol dal Sid. Quai saja bain in'excepziun ch'els sco chor viril concerteschan cun in auter chor viril, tuttina saja la cumbinaziun insatge spezial. E concerts e projects spezials saja er in dals recepts per restar attractiv sco chor.
Adina puspè contactar il giuvens
Era per il Chor viril Surses saja adina preschenta la sfida da chattar vuschs giuvnas. Cun projects spezials cuntanschian ins ina part, i saja dentant era da contactar activamain ils giuvens tranter 16 e 20 onns. In punct impurtant tenor Giancarlo Lozza saja dentant era la buna collavuraziun cun ils chors da vischnanca. Il chor da la vallada possia profitar dals chantadurs d'in chor da vischnanca, dentant era viceversa.