Suenter las demissiuns è la vischnanca da Tusaun a la testa avant ina nov’entschatta. Per il post dal president communal candideschan Remi Crameri (Center) e Leo Bassy (PPS). Era in sez en il cussegl communal vegn occupà da nov.
Remi Crameri (52 onns) ha gia fatg part da la suprastanza communala dal 2013 fin il 2019 e vuless ussa returnar en uffizi. El accentuescha sia experientscha politica da blers onns sco er sia cumpetenza da manar tras sia activitad sco vicedirectur da la Scola spezialisada superiura IBW a Cuira. Là ha el emprendì da giuditgar situaziuns cumplexas, da manar collavuraturs e da prender a mauns sfidas en moda orientada a la soluziun – abilitads ch'il politicher dal Center vul impunder en la politica communala.
Il cuntracandidat è Leo Bassy da la PPS. L'um da 36 onns è dapi il schaner 2025 en la suprastanza communala ed è actualmain il president ad interim. Per Bassy ha la stabilisaziun da las finanzas l'emprima prioritad – la vischnanca ha in deficit da radund 30 milliuns francs. El metta l'accent sin refurmas structuralas ed sin in'examinaziun critica d'andaments existents. Leo Bassy maina dapi passa 10 onns in'interpresa sanitara cun tschintg emploiads e vul integrar sias experientschas d'interpresa en la gestiun communala.
Nagina armonia en suprastanza communala
Ivo Rohrer aveva surpiglià l’uffizi l’entschatta da l’onn 2025 cun la finamira da meglierar la situaziun finanziala da la vischnanca e da lantschar refurmas structuralas. Tenor sias atgnas indicaziuns mancava ad el dentant pli e pli il sustegn entaifer la vischnanca. Er Elmer menziunescha differentas ideas davart l’orientaziun futura sco er motivs persunals per sia demissiun.
Cun l’elecziun da l’avrigl sa decida tgi che surpiglia en il futur il timun da la vischnanca ed en tge direcziun politica che Tusaun va.