Il cussegl communal da Vaz discutescha davart la contribuziun finanziala ch'è per bler sut las aspectativas dad Origen. La vischnanca stat avant la decisiun, quant sustegn finanzial ch'ella duai dar ad Origen. Entant che Origen pretenda 72'000 francs, propona l'administraziun communala mo 35'000 francs, quai ch'è gnanc la mesadad da la summa pretendida. Ils arguments cunter il sustegn cumplain èn investiziuns planisadas en l'infrastructura e la preschientscha culturala limitada dad Origen a Vaz.
Reparter 300'000 francs sin la regiun
Origen vul cuntanscher in sustegn annual da tut en tut 300'000 francs da tut la regiun. La chargia finanziala la pli gronda duai purtar la vischnanca da Surses. Las autras vischnancas, tranter quellas Alvra e Lantsch, duain contribuir tenor lur dumber d'abitantas e d'abitants.
Origen punctuescha che mintga franc regiunal genereschia 33 francs dad ulteriuras funtaunas externas. Per Origen è il signal finanzial da la regiun decisiv per garantir ulteriurs meds finanzials externs. La decisiun da Vaz da conceder pli pauc che la mesadad da la summa pretendida pudess diminuir l'abilitad dad Origen d'acquistar ulteriurs daners. Quai pudess chaschunar discussiuns en il cussegl communal, perquai che las activitads dad Origen servan er al turissem local.
