Giovanni Netzer sur dad Origen
Origen è dapli che saut, chant ed architectura. L'anteriur Festival cutural Origen è sa sviluppà ad ina fundaziun ch'è ina instituziun culturala, patruna, motor d'innovaziun e porta directamain ed indirectamain svieuta en la regiun. Il 2005 è la fundaziun vegnida installada sco uniun ed ha inaugurà in onn pli tard il Chastè da Riom cun in teater.
L'entschatta betg adina simpla – Il chastè da Riom ord l'archiv
- Il 2015 è vegnida inaugurada la Clavadeira ed uschia hai era dà teater e concerts d'enviern. Cumenzà cun il teater musical «Le Prince de Paris» che raquinta da Lureng Carisch ch'era emigrà a Paris cun sia famiglia.
- Il 2017 è vegnida construida la tur cotschna sin il Pass dal Güglia. Ina tur da saut e concerts bajegiada a temp limità.
- Dapi il 2019 s'engascha la fundaziun per laschar reviver monuments architectonics a Mulegns. In project cun vieutas e stortas è era stà il museum da viadis ed il spustament da la chasa alva.
- E l'ultim project la tur alva a Mulegns. Ina tur da 30 meters – construida cun singula tocca stampada cun betun cun l'agid da l'ETH a Turitg.
Origen cun baininqual cuntravent
Mainsvart ha la fundaziun stuì cumbatter per ses project per part extraordinaris. Uschia n'eran al cummenzament betg tuts persvas da la renovaziun dal chastè da Riom e la uttilisaziun da quel sco tribuna.
Era la tur cotschna sin il Güglia e la tur alva a Mulegns han chaschunà discussiuns cuntraversas – saja quai davart las dimensiuns – saja quai davart l'apparientscha en il vitg e sin il pass. Discussiuns ch'èn per part idas a finir en votaziuns.
Origen sco «patruna»
En il decurs da quests radund 20 onns è creschì «Origen» dal festival cultural a la «Nova Fundaziun Origen», ina instituziun culturala che dat occupaziun a 250 persunas mintg'onn. Da questas èn 40 plazzas cumplainas, las ulteriuras dependan dals concerts, teaters, ballets u operas che vegnan producidas.
La fundaziun investescha en media set milliuns francs ad onn – la gronda part deriva da donaziuns. Plinavant ha la fundaziun in contract da prestaziun da cultura cun il chantun che munta in ulteriur sustegn.
Origen sco «promotura regiunala»
Sco fundaziun è ella deliberada da taglias, paja dentant taglia da funtauna per las artistas ed ils artists che vegnan da l'entir mund. Per l'alloschis dals artists piglia la fundaziun a tschains abitaziuns en la regiun e paja en tut 250'000 francs. Las lavurs che vegnan fatgas per restauraziuns vegnan surdadas per la gronda part a la mastergnanza indigena.
Origen sco «spiritus rector»
L'um davos e davant la Nova Fundaziun Origen è Giovanni Netzer. El è l'iniziant ed intendant dal festival Origen. El è teolog e teatrist a medem temp, però era patrun e directur.
El è enconuschent per sias ideas extraordinarias – da la tur cotschna sin il Güglia fin a ses pli nov coup: La tur stampada en 3D a Mulegns.
Da l'autra vart era per sias abilitads da pudair recaltgar ils daners necessaris per ils projects – cun u senza cuntravent.
