Per Maria Pia Signorell che viva tut l'onn sin l'alp Flex èsi cler. La tschendra da defuncts tutga sin in santeri e betg en la natira e spezialmain betg en in lieu sco l'Alp Flex. Là giajan adina bleras persunas a spass e giaudian la natira. Per ella saja adina puspè grev da passar in lieu nua ch'ella sappia ch'in vischin da Surses u ina autra persuna enconuschenta saja derasada cun la tschendra. Per Maria Pia Signorell èsi dentant era cler, ch'i dovria in lieu per sa regurdar d'insatgi. «I dovra in lieu sco in santeri», resumescha l'anteriura scolasta, in lieu per commemorar la persuna.
Ina lescha exista
La lescha communala da Surses, la lescha da sepultura e da santeri reglescha bain tut quels cass e sa basa era sin leschas chantunalas. La dumonda u il dubi da dignitad dentant na regleschan quellas leschas mo per part e spezialmain na vegn betg controllà fitg ferm. Da quai èn tuts pertschert, co ch'i ha num sin dumonda.