Sco quai ch’il post da medias da la Pfeifer Timber GmbH scriva sin dumonda, dettia quai plans per Domat: «Nus essan en ina fasa da planisaziun avanzada cun pliras variantas». Actualmain dettia in svilup positiv tant en la fabricaziun cun laina sco era la mobilisaziun da laina radunda. Davart in plan da termins na possian ins per il mument dentant anc communitgar nagut.
Nus essan en ina fasa da planisaziun avanzada cun pliras variantas.
Pfeifer sto decider fin il 2026 co ch'i va vinavant
Sco quai ch’il cusseglier guvernativ Marcus Caduff ha ditg, haja la firma Pfeifer anc peda fin la fin da l’auter onn da preschentar in project. Il cusseglier guvernativ Marcus Caduff na sclauda betg in project da resgia – ma mo sche las cundiziuns vegnan ademplidas.
Tranter auter dovria in tschert dumber da plazzas da lavur. La regenza preferescha pero firmas da hightec. «Quai è in project da generaziuns. Nus vulain plazzas cun gronda creaziun da valur e na vulain betg emplenir l’areal il pli spert pussaivel», di Caduff.
Pli gugent betg pli ina resgia
Possessura da las 7,5 hectaras pertutgadas è la vischnanca burgaisa da Domat. «Sche jau guard sin quel areal oz, è quai in sentiment da cuntentientscha ed era da plaschair», di Ursin Fetz, president da vischnanca burgaisa da Domat. «Ins vesa oz edifizis gronds, novs, senza chamins, e cun passa 1'000 plazzas da lavur. Quai è in grond svilup positiv cumpareglià cun avant 15 onns.»
Sco ch’el ha ditg prefereschia el en l’avegnir ulteriuras firmas da hightec sin l’areal, ina resgia u ina fabrica per l’elavuraziun da laina na vesess el pli gugent betg sin l’areal liber.