Festival cultural Origen - I marscha bler als Mulegns

Origen dischlochescha la paraula enconuschenta da Hänsel & Gretel en la citad e trametta dus teenagers en ina notg selvadia en il guaud muntagnard. Hänsel & Gretel (per rumantsch Gionin e Grettina) n'èn betg pli povers uffants or d’ina chasa d’in taglialaina, mabain teenagers d’ina flotta citad suburbana.

Ils geniturs èn stressads: Il bab duvrass urgentamain ina cura, la mamma siemia d'ina pausa cun matta da yoga e té da mate. Ils geniturs tramettan lur uffants sin in viadi d'aventura en il guaud muntagnard nocturn – per che quels possian avair in’aventura tut speziala. Ma l'excursiun sa sviluppa tut auter che planisà.

Las chantaduras ed ils chantadurs dad Origen – Sybille Vollenweider-Diethelm, Salome Cavegn e Matthias Helm – mettan il teater musical da Giovanni Netzer ensemen cun pianist Dominic Chamot sin tribuna e dattan a l'istorgia ina dimensiun frestga e legra. En tut datti 10 preschentaziuns, quellas han lieu en la sala da l'hotel Liun e cuzzan fin ils 18 d’october.

Grond interess per la tur alva

Ed anc fin ils 19 d’october èsi pussaivel da visitar la tur alva en furma d’ina guidada. Ina da las persunas che fan la guidada è Anja Kubli. Ella ha ditg che fin ils diesch da settember hajan gia radund 1600 persunas visità ina guidada. Igl haja gì in public fitg vast, blers sajan surtut stads interessads da la cultura, igl haja dentant era gì bleras visitadras e visitaders che sajan interessads plitost da l’architectura.