La stalla veglia na correspundia betg pli a las pretensiuns dad oz, uschia ch’el e sia famiglia hajan decidì da construir ina nova stalla. Chattar in lieu adattà na saja gnanc stà uschè simpel, ha Dominik Menn ditg envers RTR. Ina da las raschuns saja che Giuf haja bleras zonas ch’èn definidas cun privel da lavinas, uschia ch’i na deva betg bleras variantas.
La fin finala ha il giuven pur chattà in lieu gist a l’entschatta dal vitg, da manaivel da la stalla existenta. Construir ina stalla a Giuf saja atgnamain medem sco en auters lieus. Ma cun quai che Giuf saja lunsch davent d’in center, sajan ils transports pli chars. Tge ch’i dovria a Giuf saja bler plaz. Cun quai che l’enviern è lung, dovria quai bler dapli spazi per magasinar il fain ch’en regiuns pli bassas.
