En il lieu dal hotel Danilo ch'è stà durant decennis in punct d’inscunter cun sia discoteca legendara è planisada ina surbajegiada cun abitaziuns e butias. La vischnanca da Surses ha dacurt dà la permissiun da construcziun per il project «Residenza Danilo», ha communitgà la possessura da l'immobiglia, la firma Salve SA cun sedia a Gambarogno en il Tessin. Part da l’interpresa fan Beat Hug, ch’ha gia realisà il resort Surses Alpin, sco era Luzi Thomann, il president dal cussegl d’administraziun da la Salve SA ed anteriur president da la societad anonima da turissem da Surses.
En il plaunterren datti tranter auter ina butia dal Coop cun ina surfatscha da 550 meters quadrat. En ils dus plauns sura vegnan construidas 18 emprimas abitaziuns per affittar. L'avertura è planisada la stad 2028. La filiala dal Coop è l'emprima ch'i dat en la Val Surses.
Il project prevesa ina garascha sutterrana, abitaziuns, spazi per diversas fatschentas cun banca ed in café. Diversas interpresas indigenas han gia mussà interess. Nov è era: Coop fa part dals interessents. Per il grossist da Basilea è previs ina zona da vendita da passa 600 meters quadrat.
Ils plans dal Coop
Fin uss aveva Coop planisà in project separà en in auter lieu a Savognin, numnadamain sin ses agen terren a l’entrada dal vitg, dasper il tancadi. Quest plan oriund da construir là ina filiala na vegnia betg persequità vinavant, pon ins leger vinavant en la communicaziun. Tge che capita cun quest terren saja anc avert.