Sco quai che Barbara Laim, da la butia La Palausa ha ditg envers RTR, saja la butia marschada adina fitg bain. Surtut la rauba fatga sezza, sco il «Autschli», in ursin per uffants che stgauda e frestgenta, saja fitg dumandà.
L'atun serra la butia
Ils 22 d’october da quest onn serra la butia La Palausa dentant, la possessura Barbara Laim n'ha betg chattà in'autra soluziun suenter che ses contract è vegnì desditg. I dettia ina pratica da medis en las localitads. In’alternativa per la butia n’haja ella betg chattà. I dovria ina tscherta grondezza, era pervi da la cusunzaria, ha ditg Barbara Laim. Uschia haja ella decidì da vender en l’avegnir ils products en l’internet. Sch’i dettia en l’avegnir tuttina anc ina giada la pussaivladad da pudair affittar ina butia adattada, alura saja ella averta da puspè avrir ina tala. Ma il mument na dettia simplamain nagut. In viadi che RTR ha fatg tras il center da Lai conferma quest maletg: Betg ina suletta vitrina è il mument vida.
