La bischutaria da crappa Artisanat serra in’emna suenter Pasca. Gia a partir dal matg vegn nova vita en la butia. Natascha Spillmann ch’ha in lavuratori da floristica ad Alvaschagn, maina da nov ina butia cun flurs.
Floristica, decoraziuns, plantas ed accessoris. Products che Natascha Spillmann vendeva pli baud mo sin empustaziun e sur l’internet, venda la dunna da 38 onns da nov era en la butia al stradun a Savognin. Ella saja fitg motivada, dad avrir ussa era ina butia fisica. Il lieu direct al stradun cun blers passants saja ideal per ella.
Legenda:
Natascha Spillmann Wasescha avra il matg sia butia da flurs a Savognin.
RTR, Federico Belotti
La pensiun cloma
Tena Frühauf ed Imelda Spinatsch che lavuran gia blers onns per la butia Artisanat, van ussa en pensiun. I saja stà ina lavur cun gronda satisfacziun, ma ussa saja ord raschuns da vegliadetgna temp da dir adia, ha ditg Tena Frühauf. Atgnamain sajan ils affars per la gronda part ids detg bain. Ma ins haja ils davos onns schon percurschì, che la bischutaria da crappa indigena na marschava betg pli uschè bain sco pli baud. Che quai haja da far cun l’internet na crai Tena Frühauf plitost betg. In bratschlet, ina chadaina u in rintg da crap n'empostan ins betg simplamain en l’internet, senza d’avair empruvà avant.
audio
Butia Artisanat a Savognin serra las portas
02:28 min, ord Actualitad dals 15.03.2022.
laschar ir. Durada: 2 minutas 28 Secundas.
La rauba che nus vendain vul la glieud palpar e sentir.
