Lantsch - Abitaziuns pajablas per indigens

Lantsch ha, sco diversas autras regiuns turisticas grischunas, er il problem che abitaziuns per indigens pajablas mancan. Tenor statistica èn da las 1'000 abitaziuns sulettamaint mintga quarta abitada da persunas indigenas.

Ina soluziun porscha dapi il 2016 la societad d'abitadi Lantsch. La societad ha construì ina chasa cun otg abitaziuns. Ussa planisescha la societad duas enfin trais chasas cun totalmain passa 20 abitaziuns per indigens. La vischnanca metta a disposiziun il terren en dretg da construcziun.

Legenda: Donat Simeon, in dals fundaturs e president da la societad, sa legra da savair porscher maun. Sco societad possian els profitar da las experientschas fatgas cun l'emprima chasa, er sch'il project nov saja bler pli grond. RTR

Il mument è in biro d'architectura vid elavurar in studi per la parcella amez la vischnanca. Impurtant saja ussa da segirar la finanziaziun da partenza – quai saja per ina societad d'abitadi savens la gronda sfida.

Vischnanca porscha maun

Per il president communal, Simon Willi, èn las experientschas fatgas cun la societad d'abitadi stadas in dals arguments principals da surdar il project a la societad. En il center stettia da construir abitaziuns pajablas per indigens, betg abitaziuns da luxus, er sch'er da quels plans sajan stads sin maisa.

Legenda: Las dus parcellas a Lanstch Cun las duas u eventualmain trais chasas vegn Lantscha a survegnir circa 25 abitaziuns per indigens. RTR

Il terren vegn surdà per 100 onns en dretg da construcziun. Donat Simeon quinta che las abitaziuns èn prontas en trais enfin quatter onns, La sfida sco societad d'abitadi saja adina er da tegnair bass ils custs. Quai saja er ina part dals divers puncts ch'ina societad d'abitadi stoppia suandar.