Il suveran da Surses po decider davart duas variantas. La suprastanza communala ed il cussegl da scola proponan da fixar il lieu existent a Grava, sco lieu per il nov bajetg da la scola primara. Sco segunda varianta ha in biro d’architectura da Turitg tschertgà in lieu alternativ per in nov bajetg da scola a Savognin. Venala ed adattada fiss tenor il biro ina parcella dal quartier Bursa, da la vart sanestra da la via dal Güglia en direcziun da Tinizong e visavi da la garascha Carisch.
Tranter 10 e 20 milliuns custa ina nova scola
Per il nov bajetg da scola a Bursa quinta la vischnanca cun in’investiziun da prest 20 milliuns francs. Mo la mesadad, pia 10 milliuns francs, custassi da bajegiar ina nova scola a Grava al lieu da scola existent.
Il suveran decida ils 10 da matg davart las duas variantas. Suenter questa decisiun vegn la suprastanza communala a laschar elavurar in project concret.
