Quai che autras regiuns han schon – in archiv cultural – duai er vegnir realisà a Savognin. La regiun da Surses haja in grond potenzial per in tal archiv, ha l'iniziant dal project ed intendant dal teater Origen Giovanni Netzer ditg durant la preschentaziun dals plans per l'anteriur hotel Pianta.
Ins haja schon chattà en l'hotel Löwen a Mulegns ed ussa er en l'hotel Pianta blers documents ed uschia saja creschida la conclusiun per in archiv cultural che duai er esser accessibel publicamain.
Lieu per documents ed inscunters
Tenor Giovanni Netzer na duai l'archiv betg mo esser in local da deposit per documents istorics, mabain er in lieu d'inscunter. Visitadras e visitaders duain avair la pussaivladad da scuvrir l'istorgia da la regiun e dal bajetg.
La vischnanca da Surses saja bain infurmada, ha il president communal Daniel Wasescha confermà envers RTR. Cun esser en ina fasa iniziala haja la suprastanza dentant betg anc tractandà giavischs u ideas. Adina puspè han singulas persunas privatas punctuà la necessitad d'in archiv cultural per la regiun.
Detagls puncto archiv cultural n'èn dentant betg anc enconuschents. La nova fundaziun Origen ha trais onns temp per generar ils daners per la cumpra e la restauraziun dal bajetg. Er da sclerir è il concept detaglià per l'archiv.