Tut sut in tetg - «In di istoric per l'istorgia da Tujetsch»

«Jau na poss bunamain betg crair ch'igl è finalmain uschè lunsch», di l'archivar communal Tarcisi Hendry. Gia avant 25 onns ha il forum cultural Tujetsch gì il giavisch da construir in nov bajetg per l'archiv cultural.

Surtut la mancanza da daners per finanziar il project da 1,8 milliuns francs ha adina puspè retardà las lavurs. Grazia a la donaziun da l'indigen Norbert Cavegn ed il sustegn da la vischnanca èsi la finala anc stà da rimnar var 600'000 francs. «Igl è stà ina chaussa da cletg. Differentas fundaziuns han sustegnì nus ed uschia avain nus pudì esser levgiads», raquinta Hendry.

Tut sut in tetg

Tgi che entra en il bajetg va l'emprim tras in corridor plain cudeschs. En ina stanza separada èn 350 stgatlas prontas per vegnir scuvridas. Stgatlas cun documents vegls, brevs e fotografias da privats, dentant era d'uniuns dal vitg. Las visitadras ed ils visitaders pon prender la stgatla e contemplar ils documents en la sala multifuncziunala. Questa sala è il cor da l'archiv cultural. In'auzada pli engiu è in'ulteriura sala multifuncziunala.

Il nov archiv cultural

Ina premiera per Gion Caminada

Per l'architect Lumnezian Gion Caminada èsi stà l'emprima giada ch'el ha creà in archiv cultural. «L'idea è stada da far in bajetg cun lain indigen sc'ina stgatla da stgazis», di Gion Caminada. La sfida saja stada da construir il bajetg uschia che las scrittiras e cudeschs survegnan anc dapli valita.

nossaistorgia.ch

Avrir la box Serrar la box

Scuvri gia ussa l'istorgia da la Svizra rumantscha e dal Grischun. Sin nossaistorgia.ch pudais Vus consultar, publitgar, participar...