La realisaziun da l'archiv cultural Tujetsch è uss garantida, cun la contribuziun supplementara da la vischnanca manchian uss anc radund 100’000 francs, quai ha il president dal forum cultural Tujetsch André Schmid ditg envers RTR. La finamira è da pudair cumenzar anc quest onn cun las lavurs vi dal bajetg nov e da terminar quellas la fin dal onn 2024.
Tut or da lain
Per pudair spargnar custs duai la gronda part dal bajetg planisà vegnir realisà cun lain indigen. Quant ch’els basegnian na possian ins anc betg dir, ma la finamira saja propi da realisar pli bler pussaivel cun lain da Tujetsch, uschia André Schmid. Planisà è in bajetg da l'architect Gion Caminada da Vrin. La planisaziun è gia finida, uss spetga la fasa da la realisaziun e suenter ch’ins è uss plirs onns vi da quest project saja impurtant da far pass per pass e da vegnir uss finalmain da realisar ils plans, uschia Schmid. En tut custa il project radund 1,6 milliuns francs. Il 2015 aveva Norbert Berther dà in'ierta d’in mez milliun francs per realisar in tal archiv cultural.
Bun quint dal 2022
In dals motivs daco ch’ins po dar in ulteriur sustegn finanzial per realisar l’archiv cultural è il bun quint dal 2022, uschia scriva la suprastanza en il messadi. Il quint serra cun in gudogn da 2 milliuns francs. Il motiv principal per quest gudogn è il surpli d’entradas fiscalas surtut en connex cun las midadas da maun. Quai saja legraivel ma la problematica che las immobiglias veglias vegnian vendidas en mauns betg indigens e ch’il spazi d’abitar per indigens vegnia uschia stgars saja l’autra vart da la medaglia, quai ha il president communal Martin Cavegn ditg al parlament. Las expensas totalas da la vischnanca muntan a 13,7 milliuns francs, las entradas a 15,7 milliuns francs. Budgetà era in surpli d’entradas da radund 400’000 francs.
