Siglir tar il cuntegn

Header

La Tgesa Alva da Mulegns duess daventar in museum.
Legenda: La Tgesa Alva da Mulegns duess daventar in museum. RTR, Federico Belotti
cuntegn

Grischun Central Origen vul avrir il 2021 in museum a Mulegns

La Nova Fundaziun Origen vul construir a Mulegns in museum da viadi. Il museum da viadi vul preschentar cun alternantas, grondas exposiziuns l’istorgia dal viagiar ch’ha cumenzà avant dapli che 4'000 onns. L’avertura da l’emprima gronda exposiziun è planisada per l’onn 2021.

Il museum duai surtut raquintar dals cumenzaments dal turissem en Surses ed en il Grischun e da l’emigraziun da noss perdavants, en consequenza da la situaziun economica. Il museum da viadi a Mulegns duess esser in museum vital, nua ch’ins po mangiar, guardar, leger, emprender e pernottar. Planisads èn er ina butia ed ina pastizaria che regorda al grond temp dals pastiziers grischuns en las metropolas europeicas.

Origen avra in biro da viadis

In «biro da viadi» organisescha guidadas istoric-culturalas en la val e sur ils pass da las Alps e raquinta dal temp da las charrotschas da posta. Novas stanzas d’occurrenzas che vegnan creadas en collavuraziun cun la scola politecnica federala SPF/ETH, pon vegnir utilisadas a moda multifara per exposiziuns, represchentaziuns da teater e festas. En in pitschen lavuratori vegn restaurada mobiglia veglia. In lieu da paus singular envida ils passants da sa fermar e mussa ad els las bellezzas dal Surses.

RR actualitad 12:00