Per Marc Graf è la situaziun clera. Be ina persuna bain infurmada sa er decider. «Quai è democrazia», resumescha il president da l'uniun Calma Grischun. Per l'anteriur professur per psichiatria forensica a l'Universitad da Basilea èsi en emprima lingia pli impurtant da spargnar energia che da realisar adina dapli ovras. «Dovri propi sutgeras stgaudadas u adina dapli servers per TikTok?» è sia dumonda retorica. Per el cleramain: «Na».
Infurmar, infurmar ed anc ina giada infurmar
Graf ch'è creschì si a Masans e viva dapi 10 onns a Churwalden s'engascha per in cuntrapais d'infurmaziun. Ils concerns d'energia han en egl da far gudogn, las consequenzas per la cuntrada e la persistenza saja en cas dal parc da vent Term Bel anc ditg betg respundida. Il mument sajan els en contact cun tut las partidas involvidas.
L'Axpo ha mess ad ir ina tur da mesiraziun da 120 meters autezza per rimnar durant in onn datas davart la spertadad e la direcziun dal vent. Plinavant vegnan rimnadas datas da l'aura e quant activs che uschels-mezmieur èn en la regiun. Sin dumonda da RTR na saja il mument betg pussaivel da dar emprims resultats. Il mument vegnian er elavurads detagls pertutgant transports da material sco er per colliar il parc da vent cun la rait.
L'Axpo po planisar – il davos pled ha dentant la populaziun
L'entir process dals emprims scleriments fin che l'ovra è construida e giess en funcziun cuzza tenor las calculaziuns da l'Axpo fin il 2031 u il 2033. Quant che quest project pudess custar na vegn però betg menziunà.
Cundiziun per realisar in tal parc da vent è il sustegn da la populaziun da las vischnancas Churwalden e Tumleastga. La finala ha la populaziun er l'ultim pled en chapitel cura ch'i va per surdar ils dretgs da construcziun. Per l'uniun Calma Grischun è l'avair ina vusch e surtut d'infurmar da fitg gronda impurtanza. Marc Graf na less betg che unicamain ils aspects economics, che sajan fitg pitschens per las vischnancas, survegnan paisa.
Per ils possessurs da terren dessi tenor las calculaziuns dal concern d'energia indemnisaziuns da totalmain 25'000 – 35'000 francs per roda davent ed onn. En quella summa èn cumpigliadas indemnisaziuns per l'energia producida, in'indemnisaziun da basa sco er l'indemnisaziun per sursgol.