Daniel Camenisch succeda a Thomas Buchli, ch'ha presidià il parc ils davos sis onns. El è vegnì elegì gievgia saira a la radunanza dals commembers. Preschent è era stà Simon Egger, il nov directur dal Parc natiral Beverin.
L’inschignier agronom da l’Argovia Simon Egger succeda a Ramona Liebeton, ch’ha timunà il parc ils ultims trais onns. Sco nova vicepresidenta dal parc è vegnida elegida Denise Dillier. Approvà han ils commembers dal parc il quint dal 2022. Quel serra equilibrà cun expensas da 2,9 milliuns francs.
Sviluppar la regiun nua che las ragischs èn
Sco quai che Daniel Camenisch ha ditg envers RTR, saja el motivà, da pudair sviluppar vinavant il parc sco president. El è creschì si a Maton e per el saja da grond’impurtanza da pudair sviluppar vinavant la regiun nua ch’el haja sias ragischs. Il focus da quest onn saja da sviluppar vinavant l’organisaziun dal parc, e da reglar la finanziaziun dal parc per ils onns 2025 – 2028.
Il nov directur dal parc Beverin Simon Egger ha ditg, ch’el haja gia chattà ina dimora a Ziràn. El sa legria sin la nova sfida. Ils davos diesch onns ha el lavurà per il chantun Argovia sco manader da la secziun cuntradas ed auas, avant è el plirs onns stà tar l’institut da perscrutaziun Agroscope a Wädenswil.
Dus a la testa dal parc van
Ramona Liebeton che banduna il parc la fin d'avrigl ha ditg, ch’ella guardia enavos sin in temp interessant e captivant. L’entschatta saja pero stada tut autra che simpla. Lavurar durant corona saja stà ina sfida. Far contacts davent dal home office saja stà ina sfida. En bella regurdientscha haja ella las votaziuns en las differentas vischnancas, nua ch’i gieva per renovar il contract dal parc per la proxima fasa da manaschi da diesch onns.
Thomas Buchli ch’ha presidià il parc ils davos sis onns ha gia bandunà il parc. El vegnia duvrà en auters uffizis. El quintia ch’ussa saja il temp madir per novas forzas al timun dal parc, cun quai ch’i cumenzia ina nova fasa da manaschi. Il parc haja fatg in grond svilup ils davos onns, ed el è da l’avis che quel saja gartegià bain.
