Pass da vacanzas da Pro Junior - Game of Surses: uffants exploreschan las atgnadads dal Surses

L'idea per «Game of Surses» saja vegnida quest onn durant Silvester, di Sandra Baltermia-Guetg. La famiglia da Tamara Wasescha saja stada envidada a tschaina a chasa a Salouf, ma avant che quella haja dastgà giudair il plat, haja la famiglia anc gì d'absolvir intgins posts en furma d'ina uschenumnada «Schnitzeljagd». Uschia saja naschida l'idea dal «Game of Surses». Las duas mammas han sinaquai organisà cun creativitad differents posts per ils uffants da la regiun che fan part al Pass da vacanzas da Pro Junior. Inspirà haja ellas era l'emissiun da televisiun «Game of Switzerland», nua che quatter teams cumbattan in encunter l'auter.

Durant in entir di han ils novs uffants, ch'èn sa participads, pudì explorar differents lieus en la regiun. Quest viadi d'exploraziun è adina cumbinà cun ligns e sfidas ch'ils uffants han gì da surmuntar – betg in encunter l'auter mabain communablamain. A l'entschatta hai gì num da chattar ina clav datiers da la staziun da la posta amez il vitg da Salouf. Igl era la clav per avrir il pastrign dal vitg nua ch'i vegn anc oz fatg paun. Ils trais buobs e las sis buobas tranter 10-13 onns han sinaquai gì da truschar a maun pasta da paun.

Per vegnir dad in lieu a l'auter ha in dals uffants gì dad installar l'app «Actionbound». Quella ha dà als uffants las instrucziuns necessarias per vegnir dad in lieu a l'auter. Las duas manadras avevan programmà l'app gia existenta cun las infurmaziuns individualas per il «Game of Surses». Suenter che la pasta dal paun è stada pronta, hai gì num da sa metter sin via en il lavuratori da Beni Sonder che fa cuppas e stgadellas da lenn.

Suenter avair survegnì in’invista en la lavur da turnar (per tudestg: drechseln) han ils uffants gì da demonstrar lur talent musical. En il chastè da Riom èn stadas prontas notas da la chanzun «Giaveischs d'unfants». Tge cletg ch'intgins dad els avevan gia ina giada chantà questa chanzun uschia ch'els han bainspert pudì registrar il chant sco mussament cun l'app sin il telefonin.

L'idea dal «Game of Surses» è ch'ils uffants pon explorar la regiun da moda interessanta ed autonoma. Per gronda part èn ils uffants da viadi persuls, ma las duas manadras Sandra Baltermia-Guetg e Tamara Wasescha èn spert al lieu sch'insatge na funcziunass betg. Schegea ch'igl è stà l’emprima ediziun n'hai dà nagins incaps pli gronds uschia che las duas manadras pon s'imaginar d'organisar quella purschida era l'auter onn en il rom dal pass da vacanzas da Pro Junior.

RTR Minisguard

Avrir la box Serrar la box

Tut las emissiun chattas ti qua.