Igl è la bunura a las 6:00 baud curt avant il pass ed il parcadi dal dazi svizzer è gia quasi plain. La finamira è clera – far ina tura. Ils blers e las bleras sa mettan sin via per far ina tura sin il Pizzo Tambo. E sco quai ch'igl è, da primavaira èsi da parter baud la bunura per evitar las lavinas bletschas dal suentermezdi. Era in per paucs kilometers pli ensi sin il spitg dal pass gira quai. Da l'Italia nà vegn ina entira gruppa dal CAS talian cun bun 30 persunas, era per far la tura sin il Pizzo Tambo. Els èn però in zic pli patgific da via, spetgan tuts in sin l'auter e partan lura vers las 7:00. Dasper quels e quellas che van a far tura na gira da quest temp però anc betg uschè bler sin il pass; be l'in u l'auter auto da turists passa.
Tut auter in pèr uras pli tard da mezdi. Il pass è fullanà, autos cruschan töffists e ciclists e quels da las turas rivan ord tuttas foras segir giuadora. Ins bada spert, igl è in mekka sin 2114 m s.m. Tgi turna gia uss da las vacanzas ubain da la fin d'emna prolungada d'Ascensiun – tgi parta forsa vers las vacanzas u va simplamain da tschella vart dal cunfin per giudair in bun café.
Jau hai bellischmas cursas a val sin naiv perpetna e suenter poss jau prender in café, ina biera ed ina plattina en il sulegl.
Avert è il Pass dal Spleia dapi la fin d'emna passada. Il bulletin da lavinas è vegnì publitgà per l'ultima giada la sonda (stgalim 1 la bunura e 2 en il decurs dal di) – ma la stagiun da turas vegn anc a cuzzar in mument. Pertge naiv hai anc avunda, igl ha be paucs tacs senza naiv sin il pass. E la stagiun dals töffists e ciclists, quella ha pir gist cumenzà e vegn a cuzzar anc ditg.
