«In pastg artifizial ha be avantatgs», declera Marinho Caminada, il president dal club da ballape Tusaun/Cazas. El haja surpiglià avant trais onns l'uffizi per realisar ils plazs cun pastg artifizial e per uschia segirar il manaschi dal club.
-
Bild 1 von 3. Il plaz da trenament che vegn engrondì ha in pastg artifizial. Bildquelle: RTR.
-
Bild 2 von 3. Bildquelle: RTR.
-
Bild 3 von 3. Il plaz da giugar principal resta natirals. Bildquelle: RTR.
Cun 500 commembers activs è il club il pli grond da la regiun e la consequenza saja che tuts dovran in lieu per trenar e giugar. Spezialmain la primavaira sajan ils pastgs savens betg anc pronts per trenaments intensivs.
30 squadras da differentas classas e ligas nizzegian l'infrastructura.
Sch'i dat tant travasch sin il plaz na possia quel betg sa ravegnir, quai saja logic, declera Caminada. Ina plazza da ballape cun pastg artifizial saja la soluziun optimala.
Grond sustegn – ma i drova anc dapli
Per realisar la plazza cun pastg artifizial quinta il club cun custs dad 1,6 milliuns francs. Il sustegn da las diversas vischnancas da la regiun, da sponsurs ed auters saja stà grond, di il president dal club. Tuttina manchian il mument anc 300'000 francs. «Enfin il settember a la radunanza generala vulain nus avair la segirtad finanziala». Ina varianta saja dentant er da redimensiunar il project. Quai dentant sco ultima pussaivladad.
Garantir il manaschi ed l'avegnir
Per Marinho Caminada è il pastg artifizial ina garanzia per il manaschi e la fin finala er ina garanzia da planisaziun. Cun ina plazza cun pastg artifizial saja la planisaziun da trenaments e gieus pli simpla.
Da pudair trenar er d'enviern sin l'atgna plazza porta natiralmain adina avantatgs.
Uschia saja l'investiziun en in pastg artifizial er in'investiziun en il futur dal club, er sch'ins na veglia atgnamain betg pli crescher, la limita saja cuntanschida, resumescha Caminada.