En il final da la Cuppa grischuna 2026 vegni tar ina nova affischa. Per l’emprima giada datti il duel Team Surselva cunter il Club da ballape Tusaun-Cazas. Las duas equipas èn sa messas tras en in turnier da qualificaziun a Domat.
Il Team Surselva ha persvadì e segirà il plaz en il final grazia ad ina victoria da 2:1 en il mezfinal cunter Cuira 97. La finalistas da l’onn passà ston uschia spetgar vinavant sin l’emprim titel dapi il 2014.
Nagin final per las defensuras dal titel
Las ballapedistas da Tusaun-Cazas han gudagnà lur mezfinal cunter las rivalas eternas e defensuras dal titel, il Club da ballape da Domat, cun 5:3 suenter sajettar penaltis. Tusaun-Cazas è uschia enavos en il final suenter avair manchentà quel il 2025 per l’emprima giada dapi ch’i dat la Cuppa grischuna da dunnas. E dapi il 2011 ha Tusaun-Cazas triumfà gist 10 giadas, uschè savens sco nagin auter.
Il final tranter Tusaun-Cazas che dat il mument a la testa da la 2. liga ed il Team Surselva che dat actualmain en la 3. liga ha lieu la gievgia d’Ascensiun, ils 14 da matg, a Cuira.