Dapi la stad passada stat Livia Peng tranter las pitgas dal FC Chelsea – in dals clubs ils pli renumads en il ballape da dunnas. Suenter staziuns a l’exteriur en Svezia ed en Spagna, ed en Germania tar il SV Werder Bremen, è il transfer a Londra stà in pass impurtant en la carriera da la golia grischuna da 23 onns.
Gia da buoba hai jau siemià da dar ballape per quest club. Igl è mintga giada in mument da bellezza cur che jau poss trair en il tricot dal FC Chelsea.
La midada sin l’insla munta dentant era novas sfidas per la golia da la naziunala svizra. Tar Chelsea è la concurrenza gronda, ed il cumbat per minutas da gieu intensiv.
Actual mo il numer 2
Malgrà il squitsch è anc adina mintga di in spezial per la giuvna Grischuna. Gia sco uffant aveva ella il siemi da giugar ina giada per il club da Londra. Oz dastga ella purtar il tricot dal FC Chelsea cun il numer 1 – trair en il tricot da quest club saja era suenter nov mais anc adina insatge spezial.
Dentant malgrà ch'ella porta si dies il numer 1, è ella actualmain mo il numer 2 davos Hannah Hampton, golia naziunala da l'Engalterra e campiunessa europeica da l'onn passà. Nov gieus ha Livia Peng dà fin oz per Chelsea. Gieus da campiunadi u era da la Champions League, il davos gieu datescha dentant da la fin da december. «Cler n'è quai betg simpel sch'ins è sin il banc da reserva».
Ma malgrà la situaziun resta la golia da Domat positiva. Impurtant per la Grischuna è er il contact direct cun ils trenaders e las trendras. Perquai dumonda ella era suenter cur ch'ella survegnia puspè ina giada la schanza da dar en gol.
«Jau vi cun quai mussar als trenaders ch'jau vi dar e ch'jau na sun betg qua per esser il numer 2». Ma ella sa, la fin finala quinta surtut la prestaziun en il trenament – quai saja l’unic ch’ella possia influenzar directamain.
Jau vi vegnir il numer 1 tar Chelsea.
Sco sportista professiunala analisescha ella exact nua ch’ella po vegnir anc meglra. Concret vul ella vegnir pli variabla sch'i va per bajegiar si il gieu. Ed era vi da la fidanza en sasezza vul ella lavurar. Tge ch'è er in fatg è che Livia Peng è cun 23 onns anc adina ina giuvna golia.
Da chasa en il sid da Londra
A Londra ha ella dentant era chattà in nov dachasa. La golia na viva betg direct en il center da la citad, mabain in zic ordaifer, en il sid da la citad datiers dal center da trenament. Quai plascha ad ella, il center cun las fullas da persunas e blera acziun fiss memia bler travasch per ella. E tuttina saja ella spert en il center cun il traffic public.
A Londra sez n'ha ella anc ditg betg vis tut quai ch'i dat da vesair, raquinta la golia da 23 onns. Ella haja perquai perfin fatg ina glista cun quai ch'ella veglia anc ir a guardar, spezialmain sche la famiglia u collegas vegnan sin visita. In lieu preferì haja ella dentant gia en la metropola englaisa cun ses 9 milliuns abitants. Canary Wharf, in lieu gist sper la Temsa.