La fin da l'onn vegnan preschentads en las singulas vischnancas ils preventivs per l'onn proxim. Fitg savens è l'interess dal suveran per quel affar fitg pitschen ed er savens vegn perquai offrì per la fin da l'onn in apero. Saja quai per attrair dapli glieud a la radunanza da preventiv u er per engraziar e star da cumpagnia. A Surses n'è quai betg auter.
«Jau sun in che dovra las cifras per savair argumentar» di il president communal da Surses Daniel Wasescha. Cun il project da generaziun, la nova chasa da scola che custa 25 milliuns francs, ha la vischnanca per l'emprima giada gì d'emprestar raps da las bancas.
Finanzialmain sa preschenta la vischnanca dentant tuttina d'ina buna vart. Impurtant saja simplamain d'adina avair in egl sin la cassa communala, uschia Wasescha.
Il project da generaziun
Las investiziuns dals onns 2025 e 2026 èn extraordinariamain autas, en spezial pervia dal project da generaziuns Scola Grava da radund 25 milliuns francs. La situaziun finanziala actuala permetta ina tala valur extrema. Ins vul cuntanscher suenter questas grondas investiziuns dals davos onns puspè in grad d'autofinanziaziun da ± 100%.
Plaschaivel è che l'onn 2025 n'ha betg stuì vegnir pajà l'entira contribuziun al manaschi dal Center da Sanadad Savognin SA. Dal credit deliberà da la radunanza communala dals 7 d'avrigl 2025 da 2 milliuns per segirar la liquiditad èn vegnids duvrads fin oz 1,5 milliuns.
Il credit na scroda betg la fin december 2025 e figurescha sin la glista dals credits d'impegn en l'annexa al quint annual. Perquai ch'ins quinta danovamain cun ina stretga da liquiditad, vegnan resguardads ils 500'000 francs restants en il preventiv 2026.
Senza resguardar la contribuziun al manaschi dal Center da Sanadad Savognin SA resultass in surpli d'entradas da 358'650 francs. Suenter las grondas investiziuns ils onns 2025 e 2026 ins sa stenta d'obtegnair puspè in'autofinanziaziun pli auta.