L'anamnesa e la diagnosa per il Center da sanadad a Savognin èn gia fatgas: Stretg cun liquiditad e custs memia auts. Concret mancan ils daners ed il deficit structural sto vegnir pli pitschen. Il medicament u in recept n'han ins però anc betg. Quai è sa mussà a la radunanza communala da Surses tar la preschentaziun. Cler è però che la populaziun sustegna «ses» ospital – tranter auter era cun il sustegn approvà pli baud.
Cler è era che la vischnanca da Surses ha ina buna basa finanziala. La radunanza communala ha pudì approvar in quint annual cun in surpli d'entradas da passa 1,6 milliuns francs – quai tar expensas da bun 35,4 milliuns francs. Tenor il president communal Daniel Wasescha fa quai bain pli simpla la discussiun.
Nova strategia fin la fin da l'onn
Però decider, nua impunder las finanzas stoppia la populaziun. Perquai duai la populaziun ed il persunal era vegnir involvads en la dumonda, tge che la vischnanca vuless insumma cun il center da sanadad, e tge purschidas che la populaziun vul avair. Enfin la fin da l'onn quinta il president al cussegl d'administraziun Luzi Thomann da pudair preschentar la strategia nova.
Pendent è actualmain anc il proceder concret tar l'iniziativa inoltrada l'atun passà. Questa pretenda da garantir il provediment da sanadad da basa dal center da sanadad, ed era il sustegn finanzial communal correspundent. Ils ultims mais èn il cussegl d'administraziun dal center ed ils responsabels da l'iniziativa stads en stretga collavuraziun. Ins veglia l'emprim spetgar las propostas concretas che vegnian dal center da sanadad. E sch'ins possia ir d'accord cun questas, lura fissi era imaginabel da retrair l'iniziativa, di Guido Luzio per ils iniziants.