La stad han Luzi Thomann e Beat Hug – da la firma Salve SA – cumprà la parcella e l'hotel amez Savognin. Il bajetg vegn spazzà en il meglier cas gia la proxima primavaira. In hotel na vegn betg realisà e davart la vischnanca n'exista er nagin interess per plans da parcar sutterrans.
Sin dumonda da RTR ha il president communal Daniel Wasescha renvià al concept da traffic. En quel saja definì nagin basegn per parcadis sutterrans. Uschia vegnan ils possessurs a realisar in parcadi sutterran per l'agen diever, ha ditg Thomann. Els quintan er cun ina fasa da planisaziun e realisaziun lunga. Quai pervia da recurs che sajan deplorablamain da spetgar per tals projects.
Emprimas abitaziuns ed in plaun cun divers affars
La parcella haja in fitg grond potenzial, ha resumà Luzi Thomann, in dals motivs per la cumpra. La finamira saja da realisar in lieu attractiv per indigens e giasts. Per il mument saja ins vi da skizzar diversas pussaivladads.
Uschia planisescha ins cun in plan cun divers affars da diversas branschas e cun emprimas abitaziuns. Ils divers discurs cun commembers da l'uniun da commerzi e mastergnanza sajan stads buns, concret saja dentant anc nagut, uschia Thomann.