La «buteia regiunala» planisescha d’avrir ina butia che sa concentrescha sin products da la regiun e serva il medem temp sco center d'infurmaziun ed inscunter per il Parc natiral Ela. Cun 19 producents che furneschan products da charn, latg e lavurs manualas, vul la cooperativa porscher ina plattafurma per producents locals.
Sco quai che Dominik Pfluger, il president da la cooperativa «buteia regiunala» ha ditg envers RTR, ins saja actualmain vi dal drizzar en la butia. Quella vegn ad esser accessibla durant 24 uras e 365 dis ad onn. Entrar pon ins cun carta da credit u chip, e pajar ad ina cassa d'autoservetsch.
Nagina concurrenza per butias localas
L’idea na saja betg da concurrenzar las butias localas - products dal mintgadi na dettia betg, ha ditg Pfluger. Ils producents possian emplenir sezs lur regals da vendita. Actualmain è la cooperativa «buteia regiunala» anc vid tschertgar donaziuns. Ina acziun da crowdfunding è pendenta.
Sustegn datti era da chantun e Confederaziun cun daners dal program da svilup regiunal PRE. Plinavant datti sustegn da l’Uniun Ela Genusswelt. L’associaziun è la buteia regiunala ch’è vegnida fundada il november 2025. Ella consista actualmain da circa 20 commembras e commembers da las branschas: agricultura, elavuraziun da victualias, artisanadi e gastronomia.
-
Bild 1 von 3. Dominik Pfluger, il president da la cooperativa «Buteia regiunala». Bildquelle: RTR.
-
Bild 2 von 3. Qua vegn endrizzada la nova butia cun products regiuals. Bildquelle: RTR.
-
Bild 3 von 3. Qua datti in center per visitaders dal Parc Ela. Bildquelle: RTR.
Center per visitaders dal Parc Ela
En il locals da la «Buteia regiunala» datti plinavant in center d’infurmaziun dal Parc Ela. Ils plans prevesan in punct d’infurmaziun davart las activitads dal Parc Ela. L'entschatta duess far il Parc Ela Trek, ha ditg Linda Netzer, la directura dal Parc Ela. Igl è plinavant previs da far occurenzas ed infurmaziuns en quest lieu. Sporadicamain duain era collavuraturas e collavuraturs dal parc esser al lieu.
Il bajetg è quel, nua che la Mazlareia Surses sa chattava pli baud. Betg morta è l'idea da far in center da visitas a Casti en il bajetg da la posta. Sco quai che Linda Netzer ha ditg, saja la vischnanca Albula/Alvra en contractivas cun la Posta Svizra che dovria actualmain anc las localitads per la distribuziun da la posta. En il preventiv dal Parc Ela ins haja dentant gia reservà meds finanzials per pudair finanziar il center per visitaders.