L'anteriur hotel Jufa a Savognin survegn in nov gestiunari: la Aves Management SA maina vinavant l’hotel vertent Jufa (Jugend- und Familienhotel) a partir dals 5 da december 2025. La gestiunaria Jufa era sa retratga, suenter che l’occupaziun era pli bassa che previs e suenter che finamiras economicas n’èn betg vegnidas cuntanschidas.
L’Aves (aves è Spagnol e vul dir utschels) vul ussa posiziunar da nov la chasa cun in concept cleramain focusà e nuncumplitgà. Plinavant fan part 72 chombras, 12 abitaziuns da vacanzas, ina pitschna zona da wellness e fitness sco er in local per ir cun skis e per bikers. L’ustaria vegn manada da nov sco «food market» che duai pussibilitar uras da mangiar flexiblas ed ina gastronomia pli simpla.
-
Bild 1 von 2. Da nov maina la gruppa Aves l'hotel a Savognin. Bildquelle: Interpresa d'inschigners ITW .
-
Bild 2 von 2. Bildquelle: Interpresa d'inschigners ITW .
Il directur Sandro Zollinger, ch'ha gia manà l’hotel sut Jufa, resta en questa funcziun. El discurra d’ina «entschatta pratica» che duai pledentar spezialmain giasts da gruppas e famiglias.
Jufa n'era betg cuntent cun svilup economic
Il svilup economic era stà pli bass che spetgà. Quai aveva da lez temp communitgà la gruppa austriaca Jufa e la gruppa d'interpresas ITW dal Principadi da Liechtenstein ch'è possessura dals bajetgs da l'hotel a Savognin.
Enstagl da 11'500 pernottaziuns avain nus 7'000 pernottaziuns.
Bain haja dà grond sustegn da la regiun – la pandemia da corona e las consequenzas hajan però franà la strategia d'expansiun.
«Donn, ma chapaivel»
Quai ha ditg la primavaira Luzi Thomann, da lez temp il president da la Turissem Val Surses Savognin Bivio SA. La gruppa Jufa haja gì grevas cundiziuns da partenza cun metter ad ir il manaschi gist durant e suenter la pandemia da corona. La gestiun da l'hotel saja stada ina fitg buna partenaria ed ins haja gì ina buna collavuraziun.
Che quella midada nunspetgada pudess donnegiar la reputaziun da l'hotellaria a Savognin na crai il president da l'organisaziun turistica betg. I dettia er exempels d'hotels che girian bain. E cun l'auter hotel en mauns austriacs ch'haja fatg naufragi – il Cube – na possian ins betg cumparegliar questa situaziun.
Pir dacurt midà direcziun
Dapi il fanadur 2024 è Sandro Zollinger nov directur da l'hotel a Savognin. Anc il settember passà aveva el communitgà sias finamiras da vulair attrair dapli giasts da l'exteriur e d'occupar meglier l'hotel durant la stad. Plinavant ha el instradà in nov partenadi cun il club da golf – e las 12 abitaziuns da vacanzas ch'eran vegnidas bajegiadas a fin sin l'enviern 2024/2025 che l'hotel administrescha era.
Hotels a Savognin – in'istorgia cun divers chapitels
Diversas lingias grassas hai dà ils ultims onns adina puspè pervi da l'hotel Cube, gist dasper la staziun a val da las pendicularas. Sco ultim ha il possessur però ademplì las pretensiuns da la dretgira regiunala per evitar la liquidaziun ch'era avant isch.
Midadas hai er dà tar l'hotel Piz Mitgel:
Gia plirs onns en planisaziun e discussiun è il ressort Viols dasper il Lai Barnagn:
Ed il Hotel Arlos ha gì da serrar, perquai ch'ins n'ha chattà nagina successiun.
Era organisaziuns turisticas fan quitads
Insumma na pari plitost d'esser ina sfida da surviver per l'hotellaria e gastronomia en la regiun da Savognin: