La fundaziun culturala Origen surpiglia il Hotel Piz Mitgel e vul sviluppar el ad in hotel cultural e da furmaziun en il decurs dals proxims onns. Sco quai che Origen communitgescha duai l'hotel en l'avegnir bain porscher pernottaziuns e gastronomia, però era daventar in hotspot vital per formats da scolaziun innovativs. Era las cooperaziuns universitaras dad Origen cun la ETH a Turitg e la Scol'auta Son Gagl duain chattar lur basa en las localitads.
Sper las midadas vi dal bajetg per porscher localitads per seminaris, exposiziuns ed ulteriuras stanzas culturalas, vul Origen bajegiar danov ina sala da teater e kino – tut quai però cun respectar la substanza istorica dal bajetg da l'hotel ch'era vegnì avert il 1874. Ils plans concrets per las midadas vul Origen preschentar la stad che vegn – ed avrir il nov hotel la stad 2027.
