Sco quai che la vischnanca da Surses ha infurmà a la radunanza communala da glindesdi saira, sajan vegnids spargnads custs cun il nov project. Uschia daventia il nov bajetg 4 meters pli curt. L'ustaria e las garderobas vegnian uschia pli pitschnas.
Plinavant dettia pli paucas fanestras, ed il bajetg saja pli bas, uschia ins possia desister da rampas e stgalims en il conturn. La cuschina da l'ustaria daventia pli simpla, e tar il material da construcziun ins possia spargnar custs, e tuttina garantir ina buna qualitad. L'entir bajetg duess esser pront sin l'emprim da november da quest onn.
Project custa tuttina dapli
Gia stà en funcziun l'enviern passà è il glatsch artifizial cun in deposit. En tut aveva il suveran da Surses lubì 4,5 milliuns per la plazza da sport a La Nars. Ussa vegn l'entir project a custar maximalmain 4,95 milliuns francs. La vischnanca da Surses ha infurmà ch'en ils 4,5 milliuns francs na saja la chareschia da 10% deplorablamain betg stada menziunada explicitamain.
Ussa ins sappia ch'i dettia actualmain ina fitg gronda chareschia, e quella saja ussa resguardada en il nov project. Ina nova votaziun na dovria quai betg pli per finir il project.
Plinavant ha la radunanza communala da Surses:
- approvà la lescha davart il diever da fieus artifizials. Quella scumonda il diever da rauba pirotecnica. La suprastanza na po betg lubir excepziuns. Il suveran ha decidì da stritgar l'artitgel otg, ch'avess previs che la suprastanza avess il dretg da lubir excepziuns per fieus artifizials.
- prolungà fin la fin da quest onn il contract da las Pendicularas da Savognin per in emprest senza tschains da dus milliuns francs. Questa prolungaziun saja stada necessaria pervi da tractativas pendentas en connex cun ina vendita pendenta d’in pachet d’aczias da la Surses Alpin SA ch'è en possess da las Pendicularas da Savognin.
- approvà in barat da terren a Cunter, quai tranter Fredy von Büren e la Devonas Gips SA. Tenor il messadi da la vischnanca da Surses n’haja quai nagin’influenza negativa sin in’eventuala cumpra dal bajetg e terren da von Büren per construir in nov lavuratori.
- approvà in credit da 240’000 francs per remplazzar la centrala termoelectrica da la serenera a Cunter.
- Approvà in credit d’impegn da 750’000 francs per construir ina via da guaud nova tranter la resgia veglia da Savognin e la resgia nova a Tinizong.
