«Il provediment d'aua è anc segirà – il diever nunnecessari d'aua dentant d'evitar», hai num en la publicaziun da la vischnanca da Seglias en la Tumleastga en il «Pöstli» dals 9 da fanadur 2026. Munta: bagnar l'iert a moda e maniera spargnusa e plitost la bun'ura u la saira, sco er betg emplenir pools e betg lavar l'auto.
Mesira preventiva
Seglias retira l'aua da baiver da l'aua sutterrana, quai as possia imaginar sco in grond lai sutterran che vegnia spisgentà da plievgia, aua da naiv e per part er funtaunas da la costa. Actualmain saja il livel d'aua sutterran anc relativamain aut, di il manader da l'ufficina da la vischnanca da Seglias, Bruno Veraguth. Fin che l'aua sutterrana reageschia sin ina fasa da chalira e sitgira giaja in temp.
Las mesiras sajan anc preventivas. Sch'i restia dentant enavant chaud e sitg saja impurtant da gia uss entschaiver da spargnar ch'ins vegnia bain sur ina fasa sitga pli lunga ora. Actualmain appellescha la vischnanca da Seglias da bagnar l'iert la bun'ura u la saira, e quai spargnus, e da betg emplenir pools u lavar l'auto a chasa u lavar il plaz avant chasa cun aua.
La glieud sa tegna bain vid las mesiras. Resuns negativs n'hai jau survegnì nagins.
Buna collavuraziun cun la populaziun
Las mesiras vegnian resguardadas bain da la populaziun – ed er en general saja la collavuraziun cun la glieud en vischnanca fitg empernaivla. En il senn dad ina controlla sporadica fetschia el qua u là magari in gir tras vischnanca, di Bruno Veraguth che lavura gia 22 onns tar la vischnanca da Seglias. Sch'insatgi na sa tegness repetidamain betg vi da las mesiras, tschertgass el il discurs cun quella persuna. Quai na saja dentant fin uss betg stà necessari. Resuns negativs da la populaziun n'haja el survegnì nagins.
Ussa èsi d'observar l'aura e sperar sin plievgia.
Sche la situaziun restia uschia, saja pussaivel ch'ins stoppia anc prender ulteriuras mesiras sco per exempel metter giu las funtaunas en il vitg. Ultimo ratio saja lura propi mo pli: baiver, cuschinar e far la duscha. Ussa saja dad observar la situaziun da l'aura e tut tenor lura reagir.
