Ch'i saja mumentan uschè sitg e chaud en il Grischun haja differentas consequenzas per l'agricultura, manegia Martin Roth, che maina la partiziun cultivaziun da plantas tar il Plantahof.
Ils tartuffels na pateschan per exempel betg mo da la sitgira, mabain era da la chalira – els smettan da crescher a partir da 30 grads.
Stress da sitgira – quai sentan las culturas en tut il chantun. Tgeninas regiuns che sajan dentant pli fitg e tgeninas main pertutgadas, quai saja grev da giuditgar.
Tgi che sa, cumbatta pia cunter la sitgira sco ils manaschis en Val Müstair, cun indrizs d'aua. Era cun far fain sa cuntegnan ils purs auter – pervia da la sitgira fan els gia ussa fain, e sch'i na crescha betg pli suenter, pon els sa gidar cun las reservas dals ultims dus onns. Ch'i plova puspè ina giada propi, quai saja uss impurtant, di Martin Roth. in pèr uras plievgia na bastan betg.
Ma i dovra era temperaturas pli bassas – 25 grads tanschan gia. La situaziun na saja dentant anc betg precara, ma en scadin cas pretensiusa – di Martin Roth.
I sto plover bler, i sto plover sur ina gronda surfatscha.
Che l'aura saja adina pli extrema e ch'i dettia periodas da sitgira adina pli lungas, saja ina consequenza da la midada dal clima. Per l'agricultura dettia differentas soluziuns per vegnir a frida cun la midada dal clima. Ina fiss da remplazzar las spezias da garnezza, per exempel da plantar panitscha empè da tirc. Il mument è il focus dentant sin la situaziun actuala e las mesiras a curta vista – e la speranza, ch'i dettia bainbaud ina fasa bletscha e pli fraida.