Societad d'impressaris GR - Felix en ses ultim onn d'uffizi – chattar emprendists è ina sfida

Il president Maurizio Pirola ha fatg valair differenzas regiunalas, entant ch'il mainafatschenta Andreas Felix metta en ses ultim onn d'uffizi ils binaris per sia successiun. In tema central resta da gudagnar persunas spezialisadas e da posiziunar l'economia da construcziun sco patrun attractiv.

Situaziun da lavur stabila

Maurizio Pirola, president da l'Uniun grischuna dals impressaris constructurs, è sa mussà cuntent cun la situaziun actuala da las incumbensas a la radunanza generala a Spleia. La situaziun saja sumegliant buna sco l'onn avant, cun incumbensas da var in fin dus mais.

Pirola ha dentant accentuà las differenzas regiunalas: entant che regiuns sco Tavau, San Murezzan e la Val dal Rain profiteschian fermamain da la construcziun auta, vivan autras regiuns surtut da la construcziun bassa e da l'infrastructura. Ils indicaturs per l'avegnir mussan tenor in studi da BAK Economics che vegn fatg mintga tschintg onns, in svilup stabil per ils proxims trais fin tschintg onns.

Tensiuns globalas e svilup dals pretschs

Signals globals fetschian vegnir malsegira l'economia da construcziun, surtut pervia dals pretschs creschents per products chaschunads dal petroli. Pli chars daventian surtut catram, betun, isolaziuns ed armadiras. Pirola cusseglia a las interpresas d'esser precautas cun pretschs fixs, perquai che l'ulteriur svilup dals pretschs saja intschert.

Tschertga successiun d'Andreas Felix

Il mainafatschenta Andreas Felix entra en ses davos onn d'uffizi e vegn ad ir en pensiun la primavaira 2027. La tschertga per sia successiun ha gia cumenzà. La suprastanza ha la finamira d'occupar il post fin la stad 2026. Felix sez metta pais da garantir ina surdada optimala e da planisar cun quità l'introducziun da sia successura u da ses successur, ha el ditg.

In giavisch central per Andreas Felix en ses ultim onn d'uffizi è l'execuziun consequenta dal contract collectiv da lavur. El è commember da la cumissiun professiunala paritetica ed è responsabel per il secretariat da quella.

Las tractativas davart il contract collectiv da lavur (vala dal 2026 – 2031) han gì lieu en l'entira Svizra, la secziun chantunala dal Grischun ha dentant pudì dar sia opiniun a moda consultativa. Felix vesa progress en il GAV, cunzunt tar la flexibilisaziun da la concepziun dal temp da lavur che correspundia meglier a las pretensiuns da la societad e da las furmas da famiglia modernas.

Promoziun da la generaziun giuvna sco incumbensa centrala

 In ulteriur tema impurtant per la Societad d’impressaris Grischuna è l'acquisiziun e la scolaziun da la generaziun giuvna. En vista a las annadas cun bleras naschientschas che van en pensiun saja ina gronda sfida da segirar persunas dal fatg. La Societad Svizra dals impressaris-constructurs ha la finamira da gudagnar mintg'onn 50 fin 60 giuvens emprendists per professiuns da construcziun, quai che vegn actualmain cuntanschì mo stgars.

Maurizio Pirola ha accentuà la necessitad da meglierar l'access a las scolas e d'infurmar geniturs davart las schanzas d'in emprendissadi en la branscha da construcziun. Andreas Felix è dentant optimistic: en vista a megatrends sco la midada energetica vesa el perspectivas stupentas per il futur da la branscha da construcziun, perquai che senza know-how da construcziun na fissan blers svilups da la societad betg da supportar. Abilitads manualas sajan era en l'avegnir dumandadas e na vegnian betg remplazzadas da chat-bots virtuals u roboters.

Lecziuns dal passà

Andreas Felix ha en l’intervista cun RTR era guardà enavos sin il dumagnar las cunvegnas da pretschs avant radund 20 onns. Questa fasa saja stada la pli difficila pervi dals resuns medials e l'emoziunalisaziun. La branscha haja emprendì da quai ed haja stabilì ina vasta cultura da compliance che vegn mintg'onn reflectada extern e cumplettada cun scolaziuns regularas, per exempel davart dretg da concurrenza e segirezza da datas.