Dus envierns cun fitg pauca naiv sajan il cuntè vi da la gula, ha Christian Simmen, il president da Valragn e commember dal cussegl d'administraziun da la pendicularas Spleia Tambo, ditg sin dumonda dad RTR. En detagl n'ha el betg vulì s'exprimer davart ils motivs pertge ch'ins na va betg ina via communabla cun il directur Fabian Koch. Koch n'è betg stà cuntanschibel per ina reacziun. Fatg è dentant ch'ins vegn er a scriver quest onn cifras cotschnas e ch'ins ha gia commulà enfin ussa ils davos onns in deficit da passa 1,1 milliuns francs.
Il directur senza savida da branscha
Fabian Koch ha cumenzà sia incumbensa il mars 2025 ed è succedì a Peter Engler ch'aveva surpiglià avant trais onns ad interim il timun da las pendicularas Spleia Tambo. Quai suenter ch'il directur e president dal cussegl d'administraziun avevan bandunà il manaschi andetgamain. Fabian Koch deriva da la branscha da marketing ed ha lavurà en differentas interpresas en la sparta da marketing, sponsoring ed events.
President dal cussegl d'administraziun è gia davent
Il president dal cussegl d'administraziun Peter P. Tschirky ha gia bandunà il cussegl, quai mussa in sguard sin la pagina d'internet da las pendicularas.
Las pendicularas Spleia Tambo han ils ultims onns cumbattì cun differentas sfidas: crisa finanziala, mancanza da naiv ed er midadas da persunal a la testa. Ussa haja ins tratg il frain d'urgenza, uschia di Simmen. El surpiglia la part operativa da las pendiculars a curta enfin media vista e l'entier cussegl surpiglia la direcziun. Quai saja in model a curta enfin media vista. Ed uschia na saja ins er betg sin la tschertga d'insatgi nov per la direcziun.
Segirar il futur cun naiv tecnica
Per modernisar e schlargiar il sistem d'ennavar da las pendicularas Spleia Tambo è vegnida fundada ina nov'organisaziun, co-finanziada da pliras vischnancas. Quai haia prioritad, ha Simmen ditg envers RTR.
Per l'emprima etappa da quellas investiziuns quintan ins cun custs da trais milliuns francs. Quella cumpiglia il provediment d'aua, la renovaziun dals indrizs d'ennavaziun tranter Tanatzhöhi e la staziun da val. En ulteriuras etappas vai lura tranter auter per ennavar er autras pistas.
La Tambo Finanz-Infra SA po cun sustegn finanzial da la vischnanca cumenzar proxima stad cun realisar l'emprima e la pli impurtanta etappa. Quai saja l'elixir per surviver.