Igl è in cler resultat per Remi Crameri da la partida dal Center, il nov president communal da Tusaun. Da l'elecziun substitutiva ha el survegnì 634 vuschs. Ses cuntracandidat da la PPS Leo Bassy è vegnì sin 158 vuschs. L'elecziun è stada necessaria perquai ch'il president d'enfin uss Ivo Rohrer aveva demissiunà suenter esser stà mo bun in onn en uffizi.
Remi Crameri (52 onns) ha gia fatg part da la suprastanza communala dal 2013 fin il 2019 e returna uss en quest gremi, quai sco president communal. Avant l'elecziun ha el accentuà sia experientscha politica da blers onns sco er sia cumpetenza da manar tras sia activitad sco vicedirectur da la Scola spezialisada superiura IBW a Cuira. Là haja el emprendì da giuditgar situaziuns cumplexas, da manar collavuraturs e da prender a mauns sfidas en moda orientada a la soluziun – abilitads ch'il politicher dal Center vul impunder en la politica communala.
Damai ch'era il vicepresident Werner Elmer era sa retratg, han ils da Tusaun medemamain gì d'eleger in nov commember dal cussegl communal. Fatg la cursa ha Patrick Oppliger da la partida populara, ch’è vegnì elegì cun 443 vuschs. La cuntracandidata socialdemocrata Monica Goerre Ponnuthurai ha fatg 263 vuschs.
Ils dus novelegids Remi Crameri e Patrick Oppliger entran immediat en uffizi, tenor la constituziun communala da Tusaun.
Il cuntracandidat per il presidi communal è stà Leo Bassy da la PPS. L'um da 36 onns è dapi il schaner 2025 en la suprastanza communala ed è stà il president ad interim. Per Bassy ha la stabilisaziun da las finanzas communalas l'emprima prioritad – la vischnanca ha in deficit da radund 30 milliuns francs. El metta l'accent sin refurmas structuralas ed sin in'examinaziun critica d'andaments existents. Leo Bassy maina dapi passa 10 onns in'interpresa sanitara cun tschintg emploiads.
Nagina armonia en suprastanza communala
Ivo Rohrer aveva surpiglià l’uffizi l’entschatta da l’onn 2025 cun la finamira da meglierar la situaziun finanziala da la vischnanca e da lantschar refurmas structuralas. Tenor sias atgnas indicaziuns mancava ad el dentant pli e pli il sustegn entaifer la vischnanca. Er Elmer menziunescha differentas ideas davart l’orientaziun futura sco er motivs persunals per sia demissiun.
