Il december passà aveva in’enquista mussà ch’ina terza da las abunentas ed abunents da la gasetta emnila La Pagina da Surmeir giavischassan ina gasetta bilingua rumantsch-tudestga empè da la gasetta rumantscha existenta.
A la radunanza da l’Uniun rumantscha da Surmeir da gievgia saira ha infurmà il president Gian Sonder ch'ins saja en discussiun cun las vischnancas da la Regiun Alvra e cun la Somedia, che stampa la Pagina da Surmeir.
Prescha na fetschia insumma betg, cunquai che la collavuraziun cun la Fundaziun Medias Rumantscha FMR funcziunia fitg bain ed era la situaziun finanziala da la URS saja fitg allegraivla il mument. Il contract cun la FMR vala anc enfin la fin da l'onn 2024. Gian Sonder accentuescha dentant da vulair resguardar il giavisch da las lecturas ed ils lecturs e d'empruvar da chattar ina buna soluziun per tuts.
Editura fa in pulit gudogn
L’Uniun rumantscha da Surmeir ch’edescha la gasetta emnila la Pagina da Surmeir, ha fatg l’onn 2021 in gudogn da 25'510 francs, tar entradas da passa 200'000 francs. In’onn avant aveva la URS anc fatg in minus da prest 9'500 francs. Il bun resultat saja d’attribuir surtut a midadas organisatoricas, ha ditg il cassier Giancarlo Lozza. Cunquai che la Fundaziun da medias Rumantschas FMR saja da nov responsabla per la lavur redacziunala, haja la URS pudì reducir ils custs da persunal da 153'000 francs l'onn 2020 sin 8300 francs l'onn passà. La gronda part da las entradas da La Pagina da Surmeir derivan dals abunaments. Ils radund 1200 abunents han l’onn passà pajà radund 130'000 francs.
Sandra Baltermia-Guetg da nov en suprastanza
Da nov part a la suprastanza fa Sandra Baltermia-Guetg, entant che Anina Janett-Sonder e Fabian Augustin èn vegnids elegids sco revisurs. Gian Sonder resta president da la URS. Sortids èn il suprastant Filip Dosch ed ils dus revisurs Adrian Cadosch e Bruno Wasescha.
