A Savognin vegn construì per 340‘000 francs in provisori cun duas stanzas da scola dasper la scola Grava. La radunanza communala da Surses ha approvà cun 105 tar 1 vusch il credit per installar in quadrin. Quel duai esser pront gia il cumenzament dal nov onn da scola. El duai vegnir duvrà per circa quatter onns enfin ch‘i dat a Savognin in nov bajetg da scola u la scola existenta da Grava è renovada ed engrondida. La suprastanza communala examinescha il mument tge varianta ch‘è la meglra.
La resgia da Tinizong vegn privatisada
Cun 96 tar 7 vuschs ha la radunanza communala approvà il contract da dretg da bajegiar per l‘areal da la resgia communala cun la Uffer SA u ina societad che sto anc vegnir fundada. Sco proxim vegn la suprastanza communala ad elavurar in contract da dretg da bajegiar sco era far eventualas ulteriuras cunvegnas en connex cun realisar il project.
Nova deponia a Cunter
Plinavant è vegnida approvada la revisiun parziala da la planisaziun locala, quai cun 110 vuschs gea ed ina abstenziun. A Burvagn/Cunter duai vegnir fatg ina deponia da material da stgavament schuber cun in volumen da 150‘000 m3. La regenza sto anc approvar la fatschenta.
Vendita da terren a pèr indigen
Als conjugals Seraina e Pascal Murbach è vegni concedì il dretg da cumprar duas parcellas cun 949 m2 terren da bajegiar a Cunter, quai per 120 francs il meter quadrat.
