Swissgrid gestiunescha la rait da tensiun maximala da la Svizra (380/220 kilovolt). Quella ha ina lunghezza da 6'700 km e procura che l'electricitad arriva a moda segira, effizienta ed ecologica là, nua ch'ella vegn duvrada.
Per che la Svizra possia er en l'avegnir profitar d'in provediment fidabel, è necessaria ina rait ferma e moderna. Il conduct tranter La Punt e Seglias ha passa 60 onns e cuntanscha prest la fin da sia durada da vita tecnica. Swissgrid planisescha perquai da renovar il conduct. La tensiun resta tuttina, il conduct vegn dentant adattà a las pretensiuns dad oz.
En la rait da tensiun maximala svizra gioga il chantun Grischun ina rolla impurtanta – per il transport da l'energia fin en ils centers da consum en la Bassa, per il barat da forza electrica cun l'Austria e l'Italia, ma era per la segirezza dal provediment surregiunal e regiunal en il chantun. Swissgrid modernisescha la rait da tensiun maximala en il Grischun cun plirs projects d'impurtanza strategica.
Tge vegn construì?
Il sectur dal conduct da 44 kilometers tranter la sutstaziun Seglias e La Punt cumpiglia 132 pitgas e vegn renovà dal tuttafatg. Las mesiras da construcziun planisadas per la sanaziun dal conduct sin il trassé existent èn cumplessivas.
L'exposiziun publica cuzza enfin ils 18 d'avust 2025, il cumenzament da construcziun è planisà l'onn 2027. En tut duessan vegnir investids 90 milliuns francs.
Tge munta quai per la regiun?
Las lavurs da construcziun succedan sin il trassé da conduct existent e n'han nagina influenza sin il maletg da la cuntrada. Il conduct ha vinavant ina tensiun da 380 kilovolt. L'exposiziun a champs electrics e magnetics resta tuttina e correspunda er en l'avegnir a las prescripziuns legalas.
Swissgrid stat en stretg barat cun las vischnancas, las proprietarias ed ils proprietaris da terren e las autoritads pertutgadas. Per ils dretgs da passar cun conducts, ils plazs da deposit ed ils access als plazzals vegnan pajadas indemnisaziuns tenor las directivas communablas da l'Uniun purila svizra e l'Associaziun da las interpresas electricas svizras.
Suenter las lavurs da construcziun metta Swissgrid ils lieus, nua che las pitgas èn plazzadas uschè bain sco pussaivel puspè en il stadi precedent. Nua che quai n'è betg pussaivel, vegnan realisadas mesiras substitutivas ordaifer il perimeter da project tenor la Lescha davart la protecziun da la natira e da la patria e las prescripziuns chantunalas.
Or da l'archiv
Il 2021 è vegnida renovada la lingia d'auta tensiun da Pradella a La Punt