L'anteriur cusseglier guvernativ Mario Cavigelli è da nov en il cussegl d'administraziun da la Swissgrid – il manaschi da rait d'electricitad naziunal. En la radunanza generala è Cavigelli vegnì elegì sco represchentant dals chantuns da la conferenza dals directurs d'energia chantunals.
Cun quai succeda Mario Cavigelli a Markus Kägi. Ils ulteriurs commembers dal cussegl èn vegnids reelegids. En pli ha la radunanza approvà tut las propostas dal cussegl d'administraziun – tranter auter ina dividenda da 30 milliuns francs per l'onn da fatschenta 2023.
