Teater Muntanellas - Premiera dal toc «Für immer jung»

Il cuntegn dal toc: En l’ustaria da Tom (Martin Schulthess) s’inscuntran el e ses meglier ami Werner (Adrian Cadosch) l’anteriura chantadura d’opera Tanne (Lucretia Sigron), che spetga sin in «date». Tom s’inamurescha en Tanne. Werner ha in’amia ch’è bler pli giuvna ch’el (Gaby, giugà da Stefanie Küchler), cun il tempo da viver na po el però betg propi tegnair pass. Er el s’inamurescha en Tanne. Entant che Gaby sa divertescha, sa deditgeschan ils trais auters a l’art dal vegnir vegl.

Acturas ed acturs cun experientscha

Ins haja repartì las rollas sin fundament da las fermezzas dals singuls acturs. Spezialmain legraivel saja il return dad Adrian Cadosch che saja puspè sin tribuna suenter ina pausa da ventg onns, di Lina Frei-Baselgia che fa la reschia dapi la mort da Philipp Lenz il 2014. In giubileum sin tribuna festivescha Martin Schulthess: Quest onn stat el gia per la 30avla giada sin tribuna per il teater Muntanellas.

In toc da teater per giuven e vegl

La gruppa en mira dal Teater Muntanellas è vasta. Malgrà ch’il toc è concepì primarmain per persunas creschidas, spera ella sin in public da 20 fin 80 onns. Sco lieu da represchentaziun serva la sala da teater da la clinica psichiatrica Beverin a Cazas che utilisescha il Teater Muntanellas dapi sia fundaziun l’onn 1978. La prevendita è gia empermettenta, perquai che la premiera dals 5 da mars è gia vendida ora per dus terzs.

Dapli dal toc da teater